محمد الطيب الأمين: يا كاردينال.. بالهنا يا ريس !!

* في احدى اجتماعات التحرير بصحيفة (أخبار اليوم) قبل عشر سنوات ضرب لنا الأستاذ الكبير أحمد البلال الطيب مثلا وهو يقول : (البت السمحة بتصاحب السمحات وكذلك الصحفي الشاطر).
* ولعل أحمد البلال قصد أن يقول بطريقة غير مباشرة (الطيور علي اشكالها تقع).
* القاعدة هذه غير دقيقة ففي بعض الأحيان تجد أجمل بت صديقة لبت جمالها دون الصفر.
* ويمكن أيضا ان يكون (أول الفصل في المدرسة صديق شخصي لطيش الفصل).
* ولكن نظرية أستاذنا أحمد البلال هي الغالبة وهي الارجح .
* وإذا نظرت الآن لمجتمعنا ستجد أن أبناء رجال الأعمال مثلا يتزوجون فيما بينهم وكذلك أبناء السياسيين وغيرهم من وجهاء المجتمع.
* تذكرت نظرية أستاذ أحمد البلال وأنا أطالع ما جادت به صحف أمس من أخبار بخصوص مكسيم.
* مكسيم هو اللاعب الوحيد الذي جاء به الكاردينال ويستحق أن نطلق عليه أسم محترف.
* ولكن نظرية أستاذ البلال تشتغل مع الكاردينال الذي يتخلص من المميزين حتى يأتي بالفاشلين وله في ذلك غرام وغرام كبير.
* الكاردينال يتضايق كثيراً من كل مميز وكل ناجح ، وبالمقابل يسعد ويصبر وربما يحتفى بالفاشلين وانصاف المواهب.
* صبر الكاردينال على (الما مدرب) محمد الطيب يؤكد أن الكاردينال يسعد بكل الفاشلين.
* لاحظ الآن ستجد أن الكاردينال ومنذ جلوسه علي كرسي الرئاسة لم يأتي بلاعب أفضل من اللاعب الذي قام بشطبه سواء أن كان لاعبا محليا او اجنبيا.
* يشطب ويسجل الأسوأ، أو يقيل ويتعاقد مع الأسوأ حتى بلغ بنا مرحلة أن يكون مدرب الهلال محمد الطيب وهذه مهانة ما بعدها مهانة.
* ضاق الكاردينال من مرتب مكسيم فوضع نية التخلص منه وساعده على ذلك إعلامه الذي خصص مساحات كبيرة للحديث عن وزن مكسيم وعن الأهداف السهلة التي ولجت مرماه.
* لو كانت للكاردينال حسنة في فريق الكرة فهي مكسيم.
* ثمانية فترات من التسجيلات والكاردينال رئيسا لم يأتي بلاعب بمواصفات وإمكانيات مكسيم.
* اوقف الكاردينال مرتب مكسيم قبل خمسة شهور ليس لأن وزنه زاد بل لأن الدولار ارتفع والجنيه وقع.
* الكاردينال حسب فهمو شايف إنو وجود مكسيم بهذا المرتب غير مفيد طالما الهلال يطير من البطولات.
* شايف كده..
* ونسى الكاردينال أن مكسيم يلعب وامامه خط دفاع يحتاج لخط دفاع إضافي..
* دفاع محتاج لخط دفاع..
* مثل حسين الجريف يحتاج لمدافع يحرسه..
* جاء مكسيم للهلال والفريق في أسوأ حالاته..
* جاء مكسيم في زمن التصفيات ومحاربة النجوم والقيل والقال..
* جاء مكسيم في زمن تغيرت فيه بيئة الهلال وأصبح الجو داخل فريق الكرة مخيف ومكهرب للحد البعيد..
* ومع ذلك كان مكسيم من اهم اسباب أي انتصار وأي نجاح حققه الهلال في الأعوام الثلاثة وبعد ذلك عاش معاناة تأخير الرواتب والحوافز ومقدم العقد وغيرها من المضايقات..
* الكاردينال بدلا من أن يعتبر مكسيم (ساس) يبني عليه الفريق ها هو يتخلص من مكسيم..
* كنا نتوقع أن يبدأ الكاردينال من مكسيم ويكمل عليه بالتعاقد مع ساماتا والأخطر منه ولكنه للاسف يتخلص الآن من الساس..
* لا ذنب لمكسيم إذا وقع الجنيه وارتفع الدولار..
* دي ما مشكلة مكسيم..
* أما بالنسبة للناس البتقول ليك: طيب تعال ادفعو ليهو انت مرتبو .. البيقول كده ديل ما عندهم منطق..
* ما عندهم منطق لأن مهمة رئيس الهلال يدفع..
* ولا انتو فاكرين مهمة رئيس الهلال يختار القمصان المشجرة والكسكتات ويوزع العدس ولبن البدرة والعدسية لدول الجوار ؟
* أنت بقيت رئيس الهلال تدفع بس .. الدولار يطلع ولا ينزل تدفع..
* لو غلبتك تمشي ويجي غيرك..
* واوع تقول لي ما دايرين مصيرنا يكون زي مصير المريخ..
* ده فهم قاصر..
* يجينا رئيس مفلس ونحن عارفنو مفلس ونبقى زي المريخ افضل من يجينا يدعي ويقول إن القروش العنده الحكومة ما عندها ومع ذلك يشطب المميزين ويتعاقد مع الفاشلين ومعايره الأول والأخير (الرخيص والسعرو عادي)..
* والحاجة دي فيها تناقض.. ما ممكن أنت تقول القروش العندك الحكومة ما عندها وتقول إنك القوة المالية الضاربة في البلد دي وتقول لو دايرين ميسي بنجيبو..
* ما ممكن تقول كده وانت بتشطب لاعب عشان فجأة اكتشفت إنو الدولار ارتفع ومرتبو بقى كبير..
* معناه الكاردينال داير ليهو لاعبين مرتباتهم لا تزيد عن الخمسة ألف جنيه..
* ولاعبين بالسعر ده إلا تجيب ناس أحمد يحيي المدافع السجلتو لينا من بحري قبل سنة ورفعتو في الكشف الإفريقي ولم يستطيع أكمل تمرين واحد مع الفريق وتم شطبه بعد ذلك..
* لا يعقل أن تمر (8) فترات تسجيلات علي الكاردينال وهو لا يزال يشرب من نفس الكأس..
* مشكلتو في كل تسجيلات بشرب من نفس الكأس والحاشية من حوله بيقولوا ليهو: ( بالهنا يا ريس) ..
* بالهنا يا ريس هي التي لحقت الهلال امات طه..
* وما أضر الكاردينال أكثر من بطانته..
* الآن القصة وضحت ..
* الكاردينال يريد مدرب (مجاني) وقد وجده..
* ويريد لاعبين بالمجان ولن يجدهم..
* وسيظل يخدع الجمهور العظيم بتصريحات معسولة..
* سيخرج مكسيم وشيبولا، وسيفشل في تجديد عقد نزار حامد وسيفرط في الثعلب ولن يسجل من هم بحجم الهلال..
* تمانية تسجيلات والحال في حالو..
* وإذا استمر ثمانية سنوات اخرى سيكون الحال أسوأ من حاله..
* الرجل اكتفى بالجوهرة وليس له استعداد لصناعة فريق كرة بل له استعداد لتدمير الفريق الموجود الآن..
* وأنا والله اطلب من جمهور الهلال أن ينظر لواقع الهلال بعين أفضل من تلك العين وتلك التصنيفات السخيفة..
* ما في زول طالب من الكاردينال حاجة، ولا الكاردينال ماسك لينا حاجة..
* علاقتنا بيهو الهلال..
* يكرب الهلال وبعد داك أن شاء الله يدعم الجنوب بالعدس ويدعم تشاد بالفاصوليا ويدعم يوغندا بالبلح ويدعم بوركينافاسو بالعدسية..
* و..و..
* والله في ..