محمد الطيب الأمين: الكاردينال شاف (ريالتنا سايلة) !!

بالعربي الكسيح

497

* الذكي هو الذي يحترم عقول الناس..
* الذي يفترض الغباء في الناس لا يعتبر ذكياً..
* والقائد الذي لا يصدق تصبح كلمته لا معنى لها ويصبح لسانه جريمة تدينه ولا تنقص من قدر الذين يتحدث عنهم (تلفيقا)..
* ولذلك لا أعتقد أن (إستقالة) السنغالي لامين هي مربط الفرس وإنما القضية هي قضية أن (التلفيق والكذب) أصبح نهجاً من مناهج الهلال في الوقت الراهن وهذا ما يؤسف له..
* يظن الكاردينال أن ثقة الناس فيه وفي لسانه لا تزال قائمة، يظن ذلك وربما لا يعلم أن ثقتنا فيه أصبحت (موية في غربال)..
* كل تصريحات الكاردينال وحواراته محل شك لا يهضمها العقل كما إنها تصريحات لا تحترم عقول هذا الشعب الهلالي الفاهم والواعي..
* حاول الكاردينال أن يتجمل ويعفي نفسه من الاخفاق وهو يتحدث عن موضوع إستقالة لامين..
* تحدث وقدم مبررات لم ترفعه في نظر الناس بل هي مبررات أسقطته حتى من نظر الذين كان رفيعاً في نظرهم..
* قال الكاردينال أن السنغالي (ما عندو شهادات) و(تمارينه عبارة عن تقسيمة وجري) و(طالب بشطب شيبوب والثعلب)..
* هكذا قال الكاردينال دون ان يحترمنا ودون أن يراعي أن الله الذي منحه (لسان) قد منحنا (عقول)..
* شيبوب هو النجم الأول عند السنغالي وهذا ثبت قولاً وعملاً..
* قولا.. تغزل السنغالي أكثر من مرة في شيبوب..
* عملاً.. شيبوب أكثر لاعب عرف المشاركة أساسياً في عهد السنغالي..
* بل أن السنغالي كان معجباً بشيبوب..
* اختار الكاردينال شيبوب والثعلب بعناية حتى (يلعب بهما على مشاعر جماهير الهلال) وقد خانه الذكاء..
* حتى الذكاء يا الكاردينال محتاج لمقومات..
* الشغلانية ما كلام والسلام..
* إختيار الثنائي شيبوب والثعلب الغرض منه تبرير ما حدث وإستغلال محبة جماهير الهلال لهذا الثنائي..
* السنغالي لم يطالب بشطب شيبوب ولا الثعلب ولن نصدق ذلك لأن مشاركة شيبوب في جميع مباريات الهلال تكذب ذلك وتكذب حتى الرسالة التي قال الكاردينال إنها وصلته من المدرب السنغالي..
* السنغالي كان عندو رأي في حسين أفول وأبعده من التشكيلة والكنبة وتم شطبه..
* فلماذا يكون للسنغالي رأي في شيبوب ومع ذلك شيبوب أساسي قبل الكراسي ؟؟
* الكاردينال قايلنا إحنا طير..
* ياخ إحترم عقولنا وقول كلام منطقي..
* ذكر الكاردينال أن كبار نجوم الهلال سعداء بإقالة السنغالي..
* والحقيقة أن نجوم الهلال بكوا بالدمع لهذا القرار..
* وبرضو إحنا عندنا مصادر وعندنا علاقات وعارفين كل نجوم الهلال ضد قرار ذهاب السنغالي..
* الكاردينال مفتكر اللاعبين ديل ما عندهم أصدقاء ولا عندهم أخوان ولا عندهم علاقات..
* نجوم الهلال غير سعداء بذهاب السنغالي ولو الكاردينال داير إثبات للكلام ده أنا جاااااهز..
* المشكلة إنو الكضب تجاوز أسباب الإستقالة وبلغ حتى البديل..
* قالوا حسين عموته..
* ولما الواطة أصبحت قالوا مفاوضاتنا مع عموته ما كانت مباشرة وكانت عن طريق رئيس نادي التطوان المغربي..
* عليك الله ده كلام ده ؟
* لشنو المفاوضات تكون عن طريق رئيس التطوان المغربي؟
* رئيس التطوان المغربي هو مدير أعمال عموته وألا شنو؟
* ما عندك تلفون عموته مثلاً ؟
* لشنو تمشي لمدرب عن طريق رئيس نادي ؟
* صدقنا إنك (أقلت) السنغالي طيب الصعب شنو في إنك تتصل لعموته؟
* الهلال نادي كبير ومعروف بيمشي لأي مدرب بالباب..
* ما بندخل زول واسطة..
* إسم الهلال هو (واسطة) في حد ذاته..
* رئيس التطوان يطلع شنو يعني؟
* التطوان ذاتو يطلع شنو؟
* عيب والله..
* عيب نكضب ونغش الناس ونشوه صورة كل زول جانا وخدمنا ؟
* لشنو لما زول يدينا ضهرو بنقول فيهو الكلام الفيهو والكلام الما فيهو؟
* ليه بنقول ده سئ السلوك وده بسئ لاخلاقنا وده زوجته (بتجهض كتير)
* هل في قائد بيصل مرحلة يقول فيها (شيبولا مرتو بتجهض كتير) عشان يجد مبرر لشطبه؟
* لشنو أخلاقنا في الهلال تصل المرحلة دي ؟
* والله المشكلة مشكلة (صدق)..
* القضية قضية إحترام لعقولنا..
* الحقيقة أن السنغالي رفض التدخل في عمله، ورفض مشاركة جمال سالم ورفض مشاركة المدافع الأجنبي..
* رفض عشان هو زول محترم وزول بيعرف كورة..
* وما هو بس.. العشري رفض ولافاني رفض وأي مدرب محترم بيرفض..
* قال أنا ما كنت عارف إنو السنغالي لامين كان عاطل ستة سنين..
* طوالي إنت في حالة كنت ما عارف؟
* لمتين إنت ما عارف؟
* وما عارف ليه ؟
* يعني إنت رئيس هلال ولا وزير التربية والتعليم عشان ما تكون عارف تفاصيل زول جاي الهلال الانت رئيسو؟
* رئيس الهلال يفترض لو في (نملة) دخلت كشف الهلال إنت تكون عارف النملة دي عمرها كم سنة وإتولدت وين..
* ما عارف دي ما بتعفيك ولا هي عذر..
* الكاردينال يواصل السير في الطريق الغلط ..
* وأنا شخصياً أتوقع بحلول عام (2019) أن يصبح الكاردينال كابتنا للهلال من داخل الملعب ورئيساً للهلال من على المقصورة ومدرباً للهلال من على البنك..
* لن يرضى بأقل من ذلك..
* شخصياً لا أستبعد أن أشاهد الكاردينال وهو يرتدي الرقم (10) ويلعب إلي جوار نزار حامد والصادق شلش..
* هو شخصيتو كده..
* بيحب كل حاجة وبيحب يغنوا ليهو وبيحب الأضواء وما بشبع من الشو وعندو مبررات لكل حاجة..
* لكن للأسف مبرراتو مضحكة ومخجلة..
* يطلق الكاردينال المبررات وكأنه يرى فينا ويرى بيننا من هو يُداري (الريالة بالمنديل)..
* يمكن الزول ده شايف (ريالتنا سايلة)..
* فاكرنا ناس وهم وما بنفهم..
* إحترم شعب الهلال عشان شعب الهلال يحترمك..
* و..و..
* ونواصل ..

التعليقات مغلقة.

WP Facebook Auto Publish Powered By : XYZScripts.com