محمد الطيب: واصلنا وأدخل (بيتنا) عشان نجيك وتجينا ..

292

* الغربة ..
* والغربة (خشم بيوت) يا مولانا ..
* وللغربة (مشتقات) و(تبعات) و(أسباب) ..
* والغربة عند الناس إرتبطت بالسفر الي (ليبيا والسعودية والدوحة) وبقية البلدان (العربية والأوروبية والإفريقية) ..
* والغربة كلمة (فضفاضة) يمكن أن نطلقها للذى ترك (زرعه) وجاء الى الخرطوم (يطارد البنات) و(يلحس الإيسكريم) ..
* وحتى إحنا فى السودان فى مرات كثيرة نحس بأننا (أغراب) أو مغتربين ..
* تختلف مسميات وأسباب الغربة ولكن يبقى (الطعم) واحد ..
* المغترب فى الغالب تجده (ينوم) بالحنين و(يصحُو) بالشوق والوجد وبعض العذابات والجراحات ..
* المغترب (يدفن) الشوق والحب فى السهر أو كما غنى ود اللمين : (ندفن الحب فى سهرنا) ..
* تعبير (الدفن) إستخدمه ود اللمين بشكل بديع فى (زاد الشجون) ولعل كلمة (ندفن) لم ترد إلا عبر حنجرة ود اللمين والله أعلم ..
* المهم ..
* الذكريات هى من أسباب (إشتعال) قلوب المغتربين ..
* وإذا سألتنى عن (أقسى) أنواع الغربة لقلت لك (غربة المتغرب داخل الوطن والمغترب داخل الحلة والغريب فى العواطف) ..
* في ناس معانا جوة الحلة لكنهم (عايشين في غربة) ..
* اليوم يُطيب لي أن أقف مع واحدة من أجمل الأغانى السودانية ..
* أغنية تعاطاها هذا الشعب وأحبها كثيرا ..
* (مالك مجافي الناس) ..
* كلمات عميقة وصادقة وحنينة كتبها الشاعر الكبير والجميل (بابكر الطاهر شرف الدين) ولحنها وغناها بصوته السعيد الفنان القامة محمود على الحاج ..
* (مالك مجافى الناس) من الأغانى القليلة التى بدأت منذ الكوبليه الأول بعلامة إستفهام وسؤال ..
* والأغنية التى تبدأ بالإستفهام بلا شك هى مُتعبة جدا للشاعر وتحتاج لكثير من الثراء والتداعي ..
* إستهل عمنا بابكر الطاهر (النص) بقوله :
مالك مجافي الناس عايش براك في غربة ؟؟
ما نحنا ناس جيرانك قضينا عشرة وصحبة
* الشطر الأول ورد فيه السؤال المباشر (مالك مجافى الناس عايش براك فى غربة) ؟؟
* ما هى الغربة التى قصدها بابكر الطاهر ؟؟
* الغربة داخل (الحلة) وقد شرح ذلك فى الشطر الثانى من مدخل الأغنية بقوله : (ما نحنا ناس جيرانك قضينا عشرة وصحبة) ..
* من خلال هذا الكوبليه وضح لي أن الفتاة المقصودة فى القصيدة هى ليس (جديدة فى الحلة) ..
* مرات الزول لما يرحل جديد فى الحى بيكون مُتحفظ ومعزول وما بيدخل سريع فى ناس الحلة ..
* ولكن الواضح أن الفتاة المقصودة هى قديمة فى الحلة والدليل قوله : (ما نحنا ناس جيرانك قضينا عشرة وصحبة) ..
* ورغم انها (قديمة حبتين) فى الحلة إلا أنها (مغتربة) و(معزولة) عن الناس ..
* والعزلة لم تكن مختصرة على شاعرنا بابكر الطاهر بل على كل ناس الحلة وهذا يظهر من قوله : (مالك مجافى الناس) .. قال (الناس) ولم يقل (مالك مجافيني) ..
* ثم يواصل :
من يوم سكنت قصادنا مالك بعيد ما بينا
لا بترعى حق الجار ولا العيد بجيبك لينا
واصلنا وادخل بيتنا عشان نجيك وتجينا
اصلو الصلات الطيبة واجب عليك وعلينا
* فى هذا الكوبليه إحتشدت الصور الرائعة والقيم الرفيعة ..
* من يوم رحل في الحلة هو (بعيد من الناس) .. نافر لا بيراعى حق (الجار) ولا حتى فى (الأعياد) بيتواصل ..
* زول كعب عديل ..
* بابكر الطاهر من خلال هذا الكوبليه إستغل ثقافته (الدينية) و(الصوفية) وعاتب هذه الفتاة عتابا لا يخلو من الفضيلة والنصيحة ..
* مربط الفرس فى هذه الأغنية قوله : (واصلنا وأدخل بيتنا عشان نجيك وتجينا) ..
* بت الجيران لما تجيكم زيارة فى البيت بتبقى ليك سمحة ..
* بتحس إنو زيارتها عيد بالنسبة ليك ..
* فى ناس كده .. لما يدخلوا (بيتكم) بتحس بالعيد حتى لو كانت الزيارة في (رمضان) ..
* حسب وجهة نظري فأن المراد من القصيدة هو (الزيارة) ..
* عمنا بابكر داير الزولة دى تجيهم في البيت وهم يمشوا ليها تعزيزا للصلات الطيبة ..
* ومحمود عبد العزير غنى : (الريدة بين الناس صلة) .. وبابكر الطاهر يريد هذه الصلة بالضبط ..
* ثم يواصل :
من يوم سكنت الحي معانا ليك شهور
لا بتمرق انت تجامل ولا بتبدي مرة شعور
حتي الطيور بتوالف ما بعيش وحيد عصفور
* (الحنك) واضح ..
* أكثر من شهر الزولة دى لا (بتمرق) ولا (بتجامل) ولا حتى بتبدي نوع من أنواع الشعور ..
* والشعور قد يكون (كلمة طيبة) أو (إبتسامة) أو (معاودة مريض) ..
* قوله : (حتى الطيور بتوالف) يريد به توصيل رسالة تفيد بأن (العصفورة) لا يطيب لها العيش وحدها ..
* ويختم بقوله :
دايرين نوالفك نحنا وانت الولف مابيهو
والجار بخاوي الجار بالفيهو والمافيهو
الناس دوام بالناس منو البعيش وحديهو
احنا ما قصرنا وانت العليك سويهو
* تستطيع أن تتخيل صورة هذه الفتاة من خلال التعبير والمفردات التى أختارها الشاعر بابكر الطاهر ..
* دايرين نوالفك وأنت الولف ما بيهو ..
* وحتى لو نحن كعبين الجار المفروض يتواصل مع الجيران مهما كانوا هكذا قصد ان يقول ..
* جارك لو كان كافر ولا مسلم ولا كعب ولا شغال ترزي ولا شغال فى الأمن ولا حركة شعبية يفترض أنك تتواصل معاهو لان الأسلام يطلب ذلك ..
* قال : الناس دوام بالناس .. هذا معروف ونزيد عليه : (الكل برب العالمين) ..
* بابكر العليهو عملو وينتظر هذه الفتاة لكى تسوى العليها ..
* القصيدة مناسبتها واضحة ومعنى الجمال فيها مشروح وهى من الأغانى الحبيبة إلى نفسي ولذلك أحس بالفشل فى ترجمتها ..
* شكرا بابكر الطاهر شرف الدين وشكرا محمود على الحاج ..
* يا أستاذة : التقلة صنعة ..
* و..و..
* ومالك مجافى الناس …(إن شاء الله المسلسلات التركية دى تضوى ليك) ..

التعليقات مغلقة.

WP Facebook Auto Publish Powered By : XYZScripts.com